Няхай гучыць родная мова!
21 лютага- Міжнародны дзень роднай мовы.
“Якія знаёмыя назвы і словы, якая цудоўная родная мова!”- гэтыя вершаваныя радкі Пімена Панчанкі сталі дэвізам дня роднай мовы, які ў гэты дзень праходзіў у нашай школе.
Шэраг мерапрыемстваў пачаўся з конкурсу “Буслік -2019”,
у якім удзельнічалі вучні 4- 9 класаў.
Далей вучні паказалі свае веды і здольнасці ў віктарыне знаўцаў роднай мовы і конкурсе малюнкаў да літаратурных твораў, якія праводзіліся ў кабінеце беларускай мовы і літаратуры.
Наступныя мерапрыемствы адбыліся ў Якімавіцкім СДК. Школьнікі пазнаёміліся з выставамі кніг беларускіх класікаў і навінкамі сучасных пісьменнікаў і паэтаў. Вельмі зацікавіла дзяцей выстава вырабаў народна-прыкладнога мастацтва.
Беларускімі народнымі песнямі сустрэлі гасцей удзельнікі вакальнага ансамбля. З цеплынёю і сардэчнасцю выконваліся песні на словы беларускіх аўтараў.
Вучні паказалі сваё майстэрства ў конкурсе чытальнікаў вершаў. Са сцэны гучалі творы Якуба Коласа, Янкі Купалы, Максіма Багдановіча, Францішка Багушэвіча, Ніла Гілевіча і іншых аўтараў.
Пераможцамі сталі : Селівончык Павел (9клас), Сапоненка Аляксандра ( 7 клас), Нягрэй Кацярына ( 6клас).
Усе удзельнікі мерапрыемстваў былі адзначаны сувенірамі.
Дзень роднай мовы прайшоў цікава і пазнавальна. І хочацца прыгадаць словы: “Мова- жывая існасць, яна жыве там, дзе ёсць людское жаданне. Будзьце разам з тымі, хто думае пра будучыню нашай роднай беларускай мовы”.
